Paschim News

  • पश्चिमन्यूज संवाददाता प्रकाशित : २०७५/५/३१ गते
    ३६० पटक
    नेपालगन्ज ।

    ‘स्मार्ट भिलेज’ निर्माण गर्नका लागि आकर्षक सेवा सुबिधा दिएर स्थानीय तहले सूचना प्रविधि अधिकृत ( आईटी अफिसर) राखेका छन् । तर स्पष्ट योजना र पूर्वाधार तयारी गर्न जनप्रतिनिधिले चासो नदिएपछि आईटी अफिसरहरु कामबिहिन भएका छन् ।

    बाँकेका सबैजसो स्थानीय तहले आईटी अफिसर राखिसकेका छन् । उनीहरु आएपछि सूचना प्रविधिको क्षेत्रमा उल्लेख्य प्रगति होला भन्ने ठानेका सर्बसाधारण काममा कुनै प्रगति नभएपछि यतिबेला निरास छन् ।

    सूचना प्रविधिका क्षेत्रमा राम्रै काम गरौंला भन्ने जोश लिएर आएका आईटी अफिसरको जोश पनि हराउँदैछ । कुनै गाउँपालिकाका आईटि अफिसर अन्य कुनै काम नभएपछि दर्ता चलानीमा बसेर कार्यालयको काम गर्छन ।

    ‘काम त मेरो गाउँपालिकालाई सूचना प्रविधिमैत्री बनाउने हो । तर बिभिन्न बाध्यताले गर्दा त्यस अनुरुप काम गर्न पाइएको छैन ।’ नयाँ— नयाँ भएका कारण पनि यस क्षेत्रमा काम गर्न ढिलाई भएको अनुभव उनको छ । ‘अध्यक्ष लगायतका जनप्रतिनिधिहरुले पक्कै चाहानुभएको छ । तर पहिलेबाटै पूर्वाधार नभएको ठाउँ भएका कारण भने जस्तो काम हुन सकेको छैन ।’

    राप्तीसोनारी गाउँपालिकाका आईटि अफिसर श्याम चौधरी कुनै पनि ‘डाटा’ लिनका लागि आफै मोटरसाईकलमा वडा कार्यालय धाउँछन् । ‘एउटा क्लिक गरेपछि सबै डाटा पाउनुपर्ने हो । तर आफै दौडिनुपर्छ । गाउँपालिका कार्यालयमा इन्टरनेटको सुबिधा भएपनि वडामा छैन,’—उनले भने ।

    आईटी अफिसरको काम टाईप गर्ने, दर्ता चलानीमा बस्नेमै सीमित भएको छ । सूचना प्रविधिमैत्री स्थानीय तह बनाउनका लागि उनीहरुबाट सल्लाह, सुझाव लिने भन्दा सामान्य काम गराउने गरिएको छ ।

    कतिपय आईटि अफिसरको काम त गाउँपालिकामा आउने जनप्रतिनिधिका लागि ‘वाईफाई’ को पासपोर्ट दिने र फेर्नेमै सीमित भएको छ । गाउँपालिकालाई सूचना प्रविधि मैत्री बनाउनका लागि क्यान महासंघ बाँकेले शनिबार जिल्लाका सबै स्थानीय तहका सूचना प्रविधि अधिकृतसंग छलफल गरेको छ ।

    छलफलका क्रममा उनीहरुले बिकास बजेटलाई मात्र जनप्रतिनिधिले प्राथमिकता दिएको भन्दै पूर्वाधार अभावले गर्दा कुनै पनि काम गर्न नसकिएको बताएको क्यान महासंघ बाँकेका अध्यक्ष भोजराज तिमिल्सेनाले बताए ।

    प्रतिकृया दिनुहोस्