आज : २०७५ आश्विन ३१ गतेPreeti to UnicodeUnicode to PreetiRoman to UnicodeDate Converter

Paschim News

  • पश्चिमन्यूज संवाददाता प्रकाशित : २०७५/४/२४ गते
    ३३९ पटक
    चितवन ।

    चितवन राष्ट्रिय निकुञ्जबाट चीन सरकारलाई उपहारस्वरुप पठाउन लागिएको दोस्रो जोडी गैंडा साउन २९ गते यहाँबाट काठमाडौँ पठाइने भएको छ ।

    निकुञ्जका प्रमुख संरक्षण अधिकृत वेदकुमार ढकालका अनुसार चिनियाँ अधिकारीले ती गैंडा साउन ३१ गते काठमाडौँबाट चीन लैजाने छन् ।

    चिनियाँ पक्षले गैंडा बोक्नका लागि ढुवानी जहाजको प्रबन्ध र विमानस्थलमा अनुमति लिने काम गरिसकेका छन् । निकुञ्ज विभागले सम्पूर्ण प्रबन्ध गरी दुई दिनअघि साउन २९ गते गैंडा पठाउन पत्राचार गरेको ढकालले बताए ।

    मौसममा खराबी देखिएकाले बाटोमा समस्या हुने भन्दै दुई दिन अगाडि नै यहाँबाट गैंडा पठाउन लागिएको हो । यसअघि पनि पहिलो जोडी गैंडालाई दुई दिनअघि नै काठमाडौँ लगेर राखिएको थियो ।

    यसअघि असार २८ गते एक जोडी गैंडा चीन पठाइएको थियो । दोस्रो जोडी गैंडामध्ये एकदेखि डेढ वर्ष उमेरको भालेको नाम ‘सोल्टी’ र डेढदेखि दुई वर्षको पोथीको नाम ‘मितिनी’ राखिएको छ ।

    निकुञ्जबाट नियन्त्रणमा लिइएका गैंडा हाल सौराहास्थित राष्ट्रिय प्रकृति संरक्षण कोष परिसरमा खाल्टो खनेर (पिटबुमामा) राखिएको छ । निकुञ्जका अधिकारीले गैंडा मानिससँग घुलमिल भएकाले लैजान समस्या नहुने जनाएका छन् ।

    यसअघि झैँ पछिल्लो जोडी गैंडा पठाउँदा पनि निकुञ्जका चिकित्सक, प्राविधिक र सहयोगी पठाइनेछ । ढकालले थप एक जना निकुञ्जका कर्मचारी पनि पठाउन आग्रह गरिएको बताए ।

    पहिलो जोडी गैंडा पठाउँदा सँगै गएका चिकित्सक र प्राविधिक फर्किसकेका छन् भने सहयोगी अझै फर्किएका छैनन् । ती गैंडालाई चीनको गोन्जाओको चिमिलोङ पार्कमा राखिएको छ । ती गैंडालाई छुट्टाछुट्टै खोरमा लगिएको भए पनि एक साता अघिदेखि एकै ठाउँमा राखिएको ढकालले बताए ।

    दोस्रो जोडी गैंडालाई संघाइको जुलोजिकल पार्कमा राखिने छ । दुई वर्षअघि चीन भ्रमणका क्रममा तत्कालीन प्रधानमन्त्री केपी शर्मा ओलीले चीन सरकारलाई दुई जोडी गैंडा उपहार दिने वचन दिएका थिए ।

    सोहीअनुरुप अहिले गैंडा पठाइएको हो । चीनमा दुई जोडी गैंडा पठाएपछि यस निकुञ्जबाट हालसम्म उपहारस्वरुप विभिन्न देश पठाएका गैंडाको संख्या ३० पुग्छ ।

    प्रतिकृया दिनुहोस्