आज : २०७५ कार्तिक २ गतेPreeti to UnicodeUnicode to PreetiRoman to UnicodeDate Converter

Paschim News

  • पश्चिमन्यूज संवाददाता प्रकाशित : २०७५/४/१४ गते
    ५३९ पटक
    काठमाडौं ।

    कार्यरत कम्पनीले सडकमा निकालीदिएपछि साउदी अरबमा अलपत्र परेका ३६ नेपालीको अवस्था झन् नाजुक बन्दै गएको छ ।

    सम्झौता अनुसारको काम र दाम नदिएको भन्दै ड्युटी नगएका कारण गत असार ३२ गते सडकमा निकालिएका नेपाली कामदारहरूको अवस्था झन्–झन् नाजुक बन्दै गएको हो । नेपाल समाचार पत्र दैनिकले खबर छापेको छ ।

    सोनमार कन्ट्रक्टिङ ट्रेडिङ एण्ड एडभरटाइजिङ कम्पनीमा क्याट्रिङको कामका लागि भन्दै २०७४ फागुन १ गते साउदी अरब पुगेका ३८ मध्ये ३६ नेपाली हाल उद्धारको प्रतिक्षामा बसिरहेका छन् ।

    असार ३२ गते ड्यूटी नगएकामा कम्पनीले झोला, कपडा लगायत बन्दोबस्तीका सामग्री सडकमै निकालिदिएको सुरक्षित आप्रवासन परियोजना सामीको दिक्तेलस्थित सूचना केन्द्रकी सहायक परामर्शकर्ता बुनादेवी बिश्वकर्माले बताइन् ।

    एकरात सडकमै बिताएका नेपालीसहित भारत र पाकिस्तानका कामदारलाई बिना जानकारी साउन १ गते राति दमामको टुक्बा पूर्वी क्षेत्रमा पु-याइएको बताइएको छ । ३८ मध्ये दुई जनालाई भने छुटाएर कुबेतको बोर्डरमा लगिएको पीडितहरूले बताएका छन् ।

    अन्तर्राष्ट्रिय रोल्पाली सेवा समाज, गुरुङ तमोधी, मधेसी संस्था, नेपाल एनबिसी, एनआरएन साउदी अरब लगायतले खाना पकाएर खाने व्यवस्था मिलाइदिए पनि दिनचर्य अन्यौलपूर्ण बनेको अलपत्रमध्येका केशब खड्काले जानकारी दिए ।

    क्याट्रिङको कामका लागि भन्दै उनीहरू जनही १ लाख २५ हजारदेखि १ लाख ५० हजार बुझाएर काठमाडौंको चावहिल मित्रपार्कस्थित इम्पावर ओभरसिज प्रालिबाट साउदी पुगेका थिए ।

    हालसम्म उनीहरूले जनही ९ सय रियाल मात्र तलव पाएको बताएका छन् । क्याट्रिङ, सप्लाईको नाम गर्दै अन्तिममा क्लिनिङको काममा लगाएको खड्काको भनाई छ । काम र दाम नदिएपछि नेपालीले एक दिन ड्यूटी इन्कार गरेकामा कम्पनीले सडकमा निकालिदिएको जनाइएको छ ।

    अलपत्र पर्नेमा खोटाङका १३, सोलुखुम्बुका नौं र भोजपुरको एक जना कामदार रहेका छन् । सिन्धुलीका तीन, मकवानपुरका दुई, सर्लाहीका दुई, म्याग्दीका एक र बाग्लुङका एक जना कामदार रहेको सुरक्षित आप्रवासन सूचना तथा परामर्श केन्द्र दिक्तेलका परामर्शकर्ता बिश्वकर्माले जानकारी दिइन् । अलपत्र पर्नेमा डडेलधुराका एक, कैलालीका एक, दैलेखका दुई र रामेछापका एक जना रहेको परामर्शकर्ता बिश्वकर्माले उल्लेख गरिन् ।

    काम गरेवापतको तलव असार ३१ गतेसम्ममा दिने शर्त कार्यान्वयन नभएपछि एक दिन काम अस्वीकार गरेको खोटाङ जालपाका शेषन राईले बताए । अलपत्र युवाले उद्धारको अपील गरेका छन् ।

    प्रतिकृया दिनुहोस्