Paschim News

  • पश्चिमन्यूज संवाददाता प्रकाशित : २०७७/२/८ गते
    ४९ पटक

    नयाँ दिल्ली :

    भारतमा एकै दिन ५ हजार ३ सय ७६ नयाँ कोरोनाका संक्रमित थपिएका छन्। एकै दिन ५ हजारभन्दा बढी संक्रमित भेटिएको यो तेस्रो पटक हो।

    बुधवार भारतमा कोरोना संक्रमणबाट १ सय ३५ जनाले ज्यान गुमाए। भारतमा यससँगै १ लाख १० हजार ८ सय १४ जनामा संक्रमण देखिएको छ भने ३ हजार ४ सय ३५ जनाको मृत्यु भएको छ।

    भारतको महाराष्ट्र सबैभन्दा बढी संक्रमणको केन्द्रमा छ। यहाँमात्र एकै दिन २ हजार २ सय ५० संक्रमित थपिएका हुन्। महाराष्ट्रमा अहिलेसम्म ३९ हजार २ सय ९७ जनामा संक्रम देखिएको हो। यहाँ ६५ जनाले ज्यान गुमाए बुधवारमात्रै। १ हजार ३ सय ९० जनाको मृत्यु भइसकेको छ यहाँ।

    महाराष्ट्रको मुम्बईमा मात्र बुधवार १ हजार ३ सय ७२ नयाँ संक्रमित थपिए। पछिल्लो चार दिनमा मुम्बईमा १ हजारभन्दा बढी नयाँ संक्रमित थपिइरहेका छन्। महाराष्ट्रका संक्रमितमा मुम्बईले ६० प्रतिशत हिस्सा ओगट्छ भने पूरै भारतका संक्रमितमध्ये ४० प्रतिशत।

    नेपालसँग सीमा जोडिएको उत्तर प्रदेशमा संक्रमितको संख्या ५ हजार भन्दा माथि पुगेको छ। बुधवार थप २ सय ४९ नयाँ संक्रमित थपिएपछि यहाँ संक्रमितको संख्या ५ हजार १ सय ९० पुगेको हो। उत्तर प्रदेशमा १ सय २७ जनाको मृत्यु भइसकेको छ। बुधवार यहाँ ४ जनाको यसैका कारण मृत्यु भयो।

    नेपालसँग सबैभन्दा लामो सीमा जोडिएको भारतीय राज्य बिहारमा कोरोनाबाट मृत्यु हुनेको संख्या १० पुगेको छ। साथै १ सय ५५ जना नयाँ संक्रमित थपिएका छन्। बिहारमा कोरोना संक्रमितको संख्या १ हजार ६ सय ७४ पुगेको छ।

    प्रतिकृया दिनुहोस्