Paschim News

  • पश्चिमन्यूज संवाददाता प्रकाशित : २०७५/९/१३ गते
    ८० पटक

    जतिबेला विज्ञानको कुरा आउँछ, धेरैजसो पुरुषकै कुरा आउँछ । फलानोले यस्तो गर्यो ढिस्कानाले उस्तो गर्यो । विज्ञानमा महिलाको योगदान पनि रहेको धेरैले बिर्सन्छन् । यहाँ एउटा यस्तै घटनाबारे कुरा गरिएको छ ।

    अमेरिकामा एउटा स्थान छ, डेनवर । त्यहाँ बस्थिन् सुसन पोटर । ८४ वर्षको उमेरमा उनको निमोनियाका कारण मृत्यु भयो । तर मृत्यु अघि उनले आफ्नो शरिर दान गरिन्, विज्ञानका लागि । अब उनको शरिरलाई नयाँ पिढीले विज्ञानमा अनुसन्धनका लागि प्रयोग गर्नेछन् ।

    प्रविधिको मद्दतले मानव शरिरलाई राम्रो तरिकाले बुझ्नका लागि उनको शरिर २७ हजार टुक्रा पारिनेछ । यस्तो पहिलो पटक हुँदैछ ।

    इन्डिया टाइम्समा छापेको रिपोर्ट अनुसार सुसनले मृत्युअघि मानवताका लागि आफूले केही गर्न चाहेको बताएकी थिइन् । यस्तो कार्य जसको असर नयाँ पिढीमा पनि परोस् ।

    सुसन दुई सन्तानकी आमा थिइन् । उनको सन् २०१५ मा मृत्यु भएको थियो । तर मृत्यु हुनु १६ वर्ष अघि नै सुसनले आफ्नो शरिर दान गर्ने निर्णय गरेकी थिइन् । यी १६ वर्ष सुसनले आफ्नो जीवन क्यामराका अगाडि व्यतित गरिन् । नेशनल जियोग्राफिकले यसलाई रेकर्ड गर्यो र यो जनवरी सन् २०१९ मा मानिसहरु समक्ष आउनेछ ।

    सुसनले थुप्रै वर्षअघि एउटा आर्टिकल पढेकी थिइन् । साइन्स र ह्युमन प्रोजेक्ट बारे पढेपछि उनले आफ्नो शरिर दान दिएर वैज्ञानिकलाई मानव शरिरबारे थप अनुसन्धान गर्न सहज होस् भन्ने सोच राखिन् । कोसिस त निकै वर्षअघि देखि नै भइरहेको थियो तर यस्तो उन्नत प्रविधीको प्रयोग पहिले हुन सकेन । यो अब सम्भव हुन सकेको छ ।

    सुसनको शरिरलाई इम्मोर्टल कर्प्स भनिन्छ । अर्थात्, एउटा यस्तो मुर्दा शरिर जो अमर छ । सू संसारको पहिलो ‘इम्मोर्टल कर्प्स’ हुन् ।

    सुसनले आफ्नो शरिर डोनेट गर्नेबारे बताउँदा सुरुमा अनुसन्धानकर्ताले अस्विकार गरेका थिए किनभने उनलाई मधुमेह थियो । साथै, उनका अन्य शल्यक्रिया पनि भएको थियो । उनलाई स्तन क्यान्सर पनि भएको थियो । तर पनि सुसनले जिद्दी गरिन् । तब अनुसन्धानकर्ताले उनीसामू एउटा शर्त राखे । बाँकी जीवन क्यामराको अगाडि बाँच्नुपर्ने ।

    मृत्युअघि सुसनले आफूलाई टुक्रा पारिने औजार हेर्न चाहेको बताइन् । साथै उनले आफूलाई राखिने फ्रिज पनि हेर्ने इच्छा देखाइन् ।

    एक अंग्रेजी वेबसाइटमा छापेको रिपोर्ट अनुसार सुसनले आफ्नो शरिर काटिरहेका बेला शास्त्रीय संगीत बजाउन र शरिर वरिपरि गुलाब राखिदिन आग्रह गरेकी छिन् ।

    प्रतिकृया दिनुहोस्